O IES Terra do Xallas ven de participar en Cracovia, Polonia, no 4º encontro de intercambio escolar dentro do programa europeo Erasmus+, que o instituto de Santa Comba está a desenvolver co seu proxecto “SOS: Sustain Our Souls” xunto con outras delegacións de Alemaña, Italia, Romanía, Grecia e os anfitrións polacos.
O proxecto desenvolvido na escola XLII Liceum Ogolnoksztalcace de Cracovia centrouse na procura das nosas raíces comúns, historia, cultura e tradicións. O alumnado de Santa Comba tivo que presentar alí os traballos realizados previamente sobre as evidencias que hai da importancia que tivo a zona do Xallas dentro do proceso da romanización e un vídeo no que se analiza a progresiva evolución da tecnoloxía na nosa zona.
En Cracovia os participantes visitaron lugares de grande importancia para a nosa historia común, como o casco antigo da cidade, o barrio xudeu, o gueto, o campo de concentración e exterminio nazi Auschwitch-Birkenau, así como a zona industrial da fábrica de Schindler.
O encontro de Cracovia conseguiu que os estudantes seguisen un itinerario a traveso da historia e a cultura descubrindo restos do pasado e a evolución da industria e a tecnoloxía. O seguinte encontro terá lugar en Slobozia, Romanía, e nel o alumnado traballará para conseguir un maior contacto coa natureza, anoando a arte ca literatura e a creación de xogos para pasar máis tempo ó aire libre.
Finalmente, o proxecto chegará ao seu fin no mes de maio, en Felsberg (Alemaña), onde se tentará darlle continuidade a este gran proxecto educativo que consegue internacionalizar o IES Terra do Xallas.
Fonte: Adiante Galicia
